Nagpanawagan ang Department of Energy (DOE) sa publiko nga magtipid sa krryente ilabi na subong nga nagahilapit na ang summer ukon tag-ilinit kung sa diin nagataas ang konsumo sa kuryente.
Suno sa ahensya, kinahanglan ini agud masiguro ang kabakod sang power supply sa pungsod sa tunga sang posibilidad nga pagtaas sa paggamit sang air conditioners, electric fans kag refrigerators.
Pahayag sang weather bureau PAGASA, posible nga ideklarar sini ang pagsugod sang tag-ilinit sa tunga-tunga sang Marso kung sa diin mahimo nga magdugay na lamang ang Northeast Monsoon ukon Amihan.
Ginganyat man ang mga konsumedor nga maglikaw sa paggamit sang high-energy-consuming activities sa tion sang peak hours, kung sa diin sumugod alas-11:00 54ng aga tubtob alas-3:00 sang hapon sa weekdays kagsumugod naman alas-6:00 sang gab-i tubtob alas-9:00 sang gab-i sa weekends sa Luzon, kag sumugod alas-11 sang aga tubtob alas-3 sang hapon kag alas-6:00 sang gab-i tubtob alas-9:00 sang gab-i sa Visayas kag Mindanao kung sa diin pinakamataas ang demand sang kuryente.
Para sa mga puluy-an, ginlaygayan sang DOE ang pag-set sa air conditioners sa 24-26°C, paggamit sang electric fans agud mapaayo ang sirkulasyon sang hangin, pag-maximize sa natural ventilation kung posible, kag paghalong sa appliances para sa optimal efficiency.
Ginrekomendar man ang paggamit sang inverter-type aircons.
Matandaan una na nga ginsiling sang power grid operator sang pungsod nga indi sini masiguro nga indi mag-angkon sang power outges sa mga palaabuton nga bulan sa pihak sang ginalauman nga bastante nga suplay sang kuryente.
Ginsiling man sang National Grid Corp of the Philippines, nga ang pila ka power plants mahimo liwat magpaidalum sa unscheduled shutdowns, kaangay sang natabo sadtong tinalikdan nga tuig.
