ROXAS CITY – Indi pa makabiyahe ang mga Public Utility Jeepney’s (PUJs) sa probinsiya sang Capiz sa pihak nga gindowngrade na sa General Community Quarantine ang syudad sang Roxas kag probinsiya kasunod sa ginpapanaug nga Executive Order No. 16 ni Governor Esteban Evan Contreras II.
Ginpahayag ni Mr. Jobert Carandang, presidente sang Hugpong Transport- Capiz nga nagpaguwa sang memorandum circular ang Land Transportation Franchising and Regulatory Board nga antes makabiyahe ang mga jeepneys, kinahanglan nila magkuha sang special permit sa talatapan.
Katuyuan sini nga masiguro ang safety sang mga pasahero kag mapatuman ang social distancing .
Ginakabig man ni Carandang nga indi patas ang nasambit nga memorandum circular bangud indi pa makasulod sa Iloilo nga yara sa gihapon sa enhanced community quarantine.
Nahibaluan pa nga ang mahatagan lamang sang special permit nga ginaduso sang LTFRB amo ang mga PUJs nga may asosasyon ukon kooperatiba.
Ginkwestyon man ni Carandang ngaa kinahanglan pa nga magkuha sang special permit antes makabiyahe bangud may yara naman sang frankisa ang ila nga mga jeepney.
Samtang bukas man si Carandang nga mapapanaugan sang penalidad ang salawayon nga mga jeepney drivers nga nagalapas sa pagsulundan kasubong sa pagpasakay sang mga pasahero nga sobra sa ginarequire nga kapasidad sini.
Obligado man sa karon ang tanan nga pasahero nga magsuksok sang face mask kag magpatuman sang social distancing.
