ROXAS CITY – Arestado ang isa ka referee matapos nga ginaalegar ginkawat ang cellphone sang isa ka pulis sa Covered Gym, sa Barangay Milibili, Roxas City.
Ang indi na paghingadlan nga pulis ang katapo sang Roxas Component City Police Station.
Samtang, ang suspek ang ginkilala kay Vergel Almalbis, 44-anyos kag residente sang Brgy. Culasi Roxas City.
Sandig sa imbestigasyon sang RCCPS, Biyernes sang gab-i, Mayo 6, ginapahayag nga ginbutang sang biktima ang cellphone nga Samsung Galaxy S10 Plus sa isa ka bangko sa sulod sang Brgy. Hall kag nagtan-aw sang basketball sa Gym, sang ulihi natukiban sini nga wala na ang amu nga cellphone.
Gintinguhaan pa nga pangitaon sang biktima ang cellphone apang wala na ini nakit-an.
Pagka-aga, Mayo 7, gintsekyar sini ang Closed-circuit Television (CCTV) kag nakit-an sini nga ginkuha sang referee sang liga ang nasambit nga gadget.
Madasig nga ginpadulungan sang mga kapulisan ang suspek sa Dinggoy Roxas Civic Center kag gin-aku sini ang ginhimo nga pagpangawat.
Kasunod sini, gin-aresto sang mga kapulisan si Almalbis kag karon nakahunong na ini sa karsel sang RCPS kag natalana nga pasakaan sang panumbongon pinaagi sa inquest proceeding.
