ROXAS CITY, CAPIZ- Nagpahanumdom ang isa ka ng pulis sa publiko natuhoy sa importansya sang Republic Act 9262 ukon Anti-Violence Against Women and Their Children Act, kasunod sang padayon nga pagtaas sang kaso sang pagpamintas sa kababainhan kag mga bata sa pungsod Pilipinas.
Sa interview sang Bombo Radyo kay Police Lieutenant Sharon P. Odoms, Women and Children Protection Desk (WCPD) Officer sang Capiz Police Provincial Office, iya ginpahayag nga madamo pa sa gihapon sang mga kababainhan ang wala gilayon nagapalapit sa otoridad bangud sa kahadlok ukon kahuya, rason nga importante nga palaparon pa ang ihibalo natuhoy sa nasambit nga layi.
Suno kay Odoms, masami nga ginapangatubang sang ila nga talatapan ang mga kaso sang pagpamintas, pagpamahog, pagpang-insulto, kag paglimita sa suporta sa mga anak—mga paglapas nga sakop sang RA 9262.
Pahayag niya, nagapadayon ang ila nga kampanya sa mga barangay kag eskwelahan para ipaintindi ang proseso sang pagpasaka sang kaso kag pagkuha sang protection order.
Ginganyat man sang opisyal ang mga komunidad nga mangin aligmat kag handa nga magbulig sa mga kababainhan kag kabataan nga posible makaeksperyensa sang kapintasan sa ila nga puluy-an.
Sa idalom sang RA 9262, hugot nga ginadumilian ang anuman nga sahi sang pagpamintas batok sa kababainhan kag sa ila nga mga kabataan, kag mahimo nga mapreso ang sin-o man nag maglapas diri.
Interviewed by Bombo Sunnie Mae Constantino Batencila
