ROXAS CITY – Nagpalab-ot sang reklamo ang duha ka persona sa talatapan sang Roxas City PNP, matapos ginaalegar gintayaan ang mga ini sang armas luthang sang isa ka pulis sa Barangay Bato, Roxas City.
Ginkilala ang mga nagreklamo nga sanday Honeyboy Billoso, 44-anyos, mangunguma kag tricycle driver kag residente sang Barangay Tanza Sur, Panay Capiz kag Don Arbolado, 35-anyos, collector sa TATC kag residente sang Barangay Mongpong, sining syudad.
Samtang ang ginareklamo ang ginkilala kay PSSg Joemar Barrera, yara sa legal nga pang-edaron, non-commission Police officer nga na-assigned sa Roxas City Police Station, kag residente Barangay Bato, Roxas City.
Sa impormasyon nga nakuha sang Bombo Radyo nagikan sa Roxas City PNP, ginapahayag nga samtang nagabakal si Billoso sa tindahan hinali na lamang ini nga ginpalapitan ni Barrera kag nagkuha sang armas luthang sa iya sling bag kag gintayaan sa dughan kag ginkasa apang wala ini naglupok.
Bangud sa kakulba ginsukmaan niya sini si Barrera nga nagabakal lamang siya.
Matapos sini gilayon naman nga nagtabok sa pihak nga dalan si Barrera kag gintayaan si Arbolado nga nagapungko sa motorsiklo apang maswerte naman nga wala naglupok ang armas luthang ni Barrera.
Mahibaluan nga yara sa impluwensya sang makahulubog nga ilimnon si Barrera samtang padayon pa ang imbestigasyon sang mga kapulisan angut sa nasambit nga insidente.
