ROXAS CITY – Nabutang karon sa kontrobersiya ang Panit-an Municipal Police Station matapos ginreklamo nga nagpangkuga ang isa nila ka pulis.
Nagpadulong sa Bombo Radyo Roxas si Joe Mark Aguirre sang Barangay Poblacion, Panit-an para i-reklamo ang pagkuga sa iya ni police officer Albaña.
Natabo ang insedente matapos nagpangayo sang responde sa mga pulis ang magulang ni Joe Mark nga si Lucky Aguirre bangud gintripingan sila sang tatlo ka mga lalaki.
Duha ka mga pulis ang nagresponde kalakip na ang ginareklamo nga si Albaña, apang wala na nila maabtan ang mga suspek nga madasig nga nagpalagyo.
Posible nagsulod sa pinsar ni Albaña nga ginatunto lamang sila sang mag-utod gani wala sini mapunggan ang kaugalingon kag iya nga namulayan si Lucky.
Bangud sa nabatian nga pagmulay sa iya magulang ginhambalan ni Joe Mark ang nasambit nga pulis nga ginkaakig sini kasunod ang pagkuga sa tagreklamo.
Bangud sa hitabo, desidido ang tagreklamo nga ipalab-ot ang iya nga reklamo sa pamunuan sang Capiz Police Provincial Office, para mahatagan sang leksyon ang nasambit nga pulis.
