ROXAS CITY – Nagpaathag ang isa ka pulis natuhoy sa natabo nga tensiyon sa tunga nila sang isa ka tricycle driver sa guha sang isa ka mall sa Arnaldo Blvd., Roxas City.
Suno kay Police Staff Sergeant Rolin Boy Fernandez, samtang nagahulat sang pasahero ang tricycle driver nga si Ramil Francisco, aksidente sini nga nakabungguan ang iya 63 anyos anyos nga iloy.
Suno kay Fernandez nga nakasugid ang iya iloy nga diutayan lang ini matumba rason nga ginpalapitan ni Fernandez si Francisco.
Apang sang nakapalapit na si Fernandez sa grupo sang mga tricycle drivers, kasubong nga wala siya ginasapak ni Francisco.
Sang iya na ini nga gin-estorya agud usisaon kun ano ang natabo, suno kay Fernandez nga wala gid nagpangayo sang pasaylo si Francisco kag sa baylo ginabasol pa ang iloy sang pulis bangud naatrasar ang iya nga pagbiyahe.
Suno kay Fernandez nga nagtuad pa si Francisco nga gin-agrabyado sang iya iloy ang pagbiyahe sini.
Bangud kasubong arogante ang nasambit nga tricycle driver suno kay Fernandez, wala ini makapugong kag nakapatupa ini sang kamot.
Apang ginklaro sang pulis nga wala niya ini ginsulok-sulok ukon ginsumbag bangud makit-an man suno diri nga kasubong natiklod lamang niya si Francisco.
