ROXAS CITY – Ginkumpirma sang OIC Chief of Police sang Escalante City sa Negros Occidental nga nagpanginmatay ang isa ka pulis nga tumandok sang Capiz sa sulod sang barracks sang 1st Negros Occidental Police Mobile Force (NOCPFMC) sa syudad sang Escalante.
Sa interview sang Bombo Radyo Roxas kay Police Lt. Col. Necerato Sabando Jr., ginpahayag sini nga nagaguwa sa imbestigasyon nga nagsuicide si Patrolman Richard Villasis 24-anyos sang Barangay Jaena Norte, Jamindan, Capiz.
Nag-angkon sang isa ka pilas sa nawala nga bahin sang dughan ang biktima matapos i-sentro diri ang issued firearm nga caliber 45.
Posible nga wala nabatian sang kaupdanan sang biktima ang lupok sang armas, bangud ginputos ini sang tualya ni Patrolman Villasis, gani mahinay lamang ang nangin lupok.
Posible nga na-depressed ang nasambit nga pulis, matapos mahibaluan nga may ginasuprer nga sakit ang ina.
Suno kay Sabando nga pinapahanugutan man nga makapauli ang biktima, apang na-obserbahan sang mga kaupdanan sini nga kasubong naglain si Villasis tobtob nga nakita na lamang ini sang kaupod nga si Police Staff Sgt Romel Aguilar nga nagahamyangon sa hiligdaan kag nagapaligo sang kaugalingon nga dugo.
Nagpalab-ot na sang pagpakig-unong si Sabando sa pamilya ni Patrolman Villasis.
