ROXAS CITY – Pagadepensahan sang isa ka pulis nga miyembro sang Capiz Police Provincial Office ang iya kaugalingon natuhoy sa ginpasaka nga kaso nga Rape batuk sa iya sang isa ka ginang nga asawa sang iya kabaro man nga pulis.
Base sa nakuha nga impormasyon sang Bombo Radyo, gintalana sang Office of the City Prosecutor sa Enero 21, 2020 ang preliminary investigation sa kaso nga ginpasaka sang wala na ginhingadlan nga ginang.
Nahibaluan nga nagpangita naman sang iya nga legal counsel ang suspek nga pulis.
Mahibaluan nga sandig sa sworn statement sang biktima, nangin mag-abyan sila sang suspek nga pulis bangud nangin kliyente niya ini sa iya ginatrabahuan nga establisyemento.
Apang lipod sang ginang nga may malain nga buko ang pulis sa iya sa diin natabo ang ginaalegar pagpanghimulos sa iya sang Enero 5, 2018 matapos nga nagkit-anay sila sa isa ka mall.
Suno diri nga gindala siya sang suspek sa isa ka Inn sa Barangay Punta Tabuc kag didto ginpahog nga patyon kun indi ini mag-upod.
Bangud sa kahadlok wala sang nahimo ang ginang kag ginsunod ang nasambit nga pulis kun sa diin diri na ini ginhimuslan.
Ginpahayag nga wala nagsugid ang tagreklamo sa iya bana nga pulis sang ginhimo nga paghimulos sa iya bangud sa pamahog sang suspek nga ipalapta ang natabo sa ila.
Apang sang Nobyembre 2, 2019 lamang ini nagkaisog nga magsugid sa bana sa ginhimo sa iya sang suspek kasunod sang liwat nga pagpabatyag sang suspek kag kasubong luyag pa nga masulit ang natabo sa ila.
