Pulis, pilason matapos nabungguan sang salakyan ang ginamaneho sini nga motorsiklo

ROXAS CITY – Pilason ang isa ka pulis matapos nabungguan ang ginamaneho sini nga motorsiklo sa Barangay Lawaan, Roxas City.

Ginkilala ang biktima kay Aljun Berdugo, 35 anyos, residente sang Barangay Candual, Panay, miyembro sang Philippine National Police (PNP) nga assigned sa siyudad sang Roxas.

Mahibaluan nga padulong kuntani sa Barangay Lawaan ang biktima apang sang magaliko na ini sa kurbadahon nga porsyon sang karsada, didto kag aksidente ini nga nabungguan sang salakyan nga ginamaneho sang isa ka doktor nga si Mary Grace Anisco, 35 anyos sang Barangay Barra, Roxas City.

Bangud diri nadulaan sang kontrol sa manibela ang biktima rason nga natumba ini sa dalan.

Gilayon naman nga gindapatan sang nagakaigo nga pagbulong ang biktima.