Nagpabalhag sang blotter sa Sigma Municipal Police Station ang pila ka pumuluyo sang Barangay Mangoso, Sigma, Capiz matapos ang gina-alegar pagpalupok sang armas-luthang sang isa ka pulis sa ila nga lugar.
Sa interview sang Bombo Radyo kay Police Major Marvin Balmes, Hepe sang Sigma Municipal Police Station, iya ginpahayag nga may nagpadulong nga mga pumuluyo sa ila talatapan sang Nobyembre 2, 2025 naangut sa pagpalupok sang nasambit nga pulis.
Suno kay Police Major Balmes, ang wala ginhinngadlan nga pulis ang tumandok sa banwa sang Sigma apang ini ang naka-assign sa bahin sang isla sang Boracay.
Sandig sa blotter report, naga-inom ang tatlo ka persona lakip na ang nasambit nga pulis apang wala sang may nakasaksi kun bala ang nasambit nga indibidwal ang nagpalupok sang armas-luthang.
Pahayag pa niya, wala marecover ang armas-luthang nga gingamit sa pagpinalupok sa lugar.
Nagpasalig man ang natungdan nga ila pagatutukan ang nasambit nga blotter agud nga indi na maliwat ang amo nga insidente nga nakahatag man sang kakugmat sa mga pumuluyo.
