IVISAN CAPIZ – Ginsaka sang wala pa matumod nga kawatan ang puluy-an sa Barangay Malocloc, Ivisan Capiz.
Sa interview sang Bombo Radyo sa tag-iya sang amu nga puluy-an nga si Raquel Mendoza ginpahayag sini nga mga takna ala 1:00 sang maga-aga natabo ang pagpangawat kung sa diin natigayon nga mataban ang iya cellphone nga naka-charge kag cellphone sang iya iloy.
Suno kay Mendoza, nadalasa man sang makawat ang iya kwarta nga sensilyuhon kag sang iya iloy nga nasulod sa bag.
Sa iya pagtsekyar sa ila puluy-an natalupangdan na lamang niya nga bukas na ang pertahan sang ila kusina kag posible nga nag-agi ini sa ila abuhan.
Mahibaluan nga antes pa sila nakawatan, ginsiling ni Mendoza nga base sa ila mga kaingod duha pa ka mga puluy-an ang ginsulod man sang kawatan apang maswerte lamang nga wala ini sang may nadala.
Sa paglaragway sang mga nakakita sa suspek ini ang mataas, mabukod kag nakasuksok sang raincoat kag backpack.
Panawagan sini sa publiko kung sin-o man ang mabaligyaan sang Vivo Y01 nagaduag asul nga cellphone, palihog lamang magpakig-angut sa ila ukon barangay officials kag mga kapulisan.
Sa karon, nagapadayon pa ang imbestigasyon angut sa nasambit nga insidente agud matul-id kag madakpan ang yara sa likod sang pagpangawat.
