ROXAS CITY – Gintupok sang kalayo ang isa ka puluy-an sa Sitio Bang-ogay, Barangay Natividad, Pilar, Capiz kahapon Nobyembre 08, 2023.
Ang amu nga puluy-an ang ginapanag-iyahan sang mag-asawa nga sanday Alpehie R. Tulio kag Analie C. Genosas.
Sa impormasyon nga nakuha sang Bombo Radyo sa lugar, ginapahayag nga wala sang tawo ang amu nga puluy-an sang nagluntad ang sunog.
Mahibaluan nga bangud sa pagbinuliganay sang mga residente sa lugar natigayon nga mapalong ang kalayo kag gindeklarar nga fire-out sang katapo sang Bureau of Fire Protection (BFP) Pilar takna 9:30 sang aga.
Maswerte na lamang nga wala sang may naulamid sa amu nga insidente kag ginapahayag naglab-ot sa P3,000.00 ang ginbilin nga halit sang amu nga sunog.
Samtang, padayon naman ang pagpatigayon sang imbestigasyon sang mga otoridad kung anu ang gintunaan sang kalayo.
