BAYBAY ROXAS CITY – Wala natigayon nga makawatan ang isa ka puluy-an, matapos makapangayo sang bulig ang tag-iya sang balay sa Sitio San Juan, Barangay Baybay, Roxas City.
Ginkilala ang tag-iya sang kay Lavella Vista, 46-anyos samtang ang ginapahayag suspek ang ginkilala kay Ernesto Bergantinos III, 44-anyos, tricycle driver lunsay mga residente sang Sitio San Juan, Barangay Baybay sining syudad.
Sa impormasyon nga nakuha sang Bombo Radyo nagikan sa Roxas City PNP, ginpahayag nga suno sa biktima takna alas 4:00 sang hapon samtang yara ini sa ila puluy-an kaupod ang menor de edad sini nga anak sang hinali lamang nga nagsulod sa ila kwarto ang amu nga suspek.
Bangud sini, gilayon siya nga nagsinggit kag nagpangayo sang bulig rason nga madasig nga nakadalagan kag nakaguha ang suspek sa ila puluy-an.
Gilayon man nga ginrespondihan sang mga kapulisan ang puluy-an sang biktima kag natigayon nga madakpan ang suspek matapos ang insidente.
Sa karun, yara na sa kustodiya sang Roxas City PNP ang nasambit nga suspek para sa nagakaigo nga disposisyon.
