PUNTA TABUC, ROXAS CITY – Ginsiling ni Punong Barangay Nestor Buenviaje sang Barangay Punta Tabuc nga suluyupan ang puluy-an kung sa diin nadakpan ang anum ka mga persona sa ginkasa nga drug buy-bust operation sang mga otoridad.
Matandaan nga ginkilala ang mga nagkaladakpan nga sanday Marilou Degala Abuyo, 54-anyos, subject sa drug buy bust operation, kag 17-anyos sini nga bata nga lalaki, Maliza Delo Santos Magbanua, 31-anyos, residente sang Barangay Lonoy, Leonardo Capote Bendoy, 24-anyos, residente sang Barangay Dingingan Ilawod, Ronmar Cañezares, 26-anyos, residente sang Barangay Baybay, Ronilo Araque, residente sang Barangay Punta Tabuc, sining syudad.
Nakuha sa posesyon sang mga ini ang 16 tanan ka sachets sang ginapatihan shabu nga may estimated Standard Drug Price nga P108, 800.00 kay ginabulubanta may kabug-aton nga 16 gramos, kag mga drug paraphernalia’s.
Sa interview sang Bombo Radyo kay Buenviaje, ginpahayag sini nga antes paman ang amu nga operasyon una na nila nga ginpadulungan ang lugar kung sa diin paga-istoryahon kun tani apang napaslawan sila matapos nga wala sila ginsapak kag ginasaraduhan pa sang kudal.
Suno pa diri nga indi mapanginwala nga wala nagahimo sang illegal nga buluhaton ang mga nadakpan bangud sila mismo ang nakakita sang mga sachet nga nagalalapta lamang kag nagawigit sa dalan.
Mahibaluan nga sang mga tinalikdan nga bulan, isa ang barangay ni Buenviaje sa mga mainit nga lugar sa mga kapulisan ilabi na sa PDEA bangud ginapahayag nga isa ini ka pugaran sang mga nagaduso sang illegal nga droga.
Bangud sini, nagpalab-ot sang pagtamyaw ang nasambit nga PB sa PDEA 6 sa nangin madinalag-on nga operasyon agud matigayon nga madakop ang mga indibidwal nga padayon nga nagahimo sang kaangay sini nga buluhaton.
Panugyan ni Buenviaje sa padayon nga nagahimo sini nga kun tani untatan na kag sila nga yara sa puwesto nagapasiguro nga indi mag-untat nga himuon ang ila obligasyon kag responsibilidad.
