ROXAS CITY – Palamangkutanon sa karun para sa pamilya ni Atty. Mateo Hachuela alakalde sa banwa sang Dumarao, ang nagluntad nga ginapahayag ginhabuyan sang granada ang ila puluy-an sa Poblacion Ilaya, Dumarao Capiz, takna alas 8:48 sang gab-i Agusto 5, 2023.
Sa impormasyon nagikan sa Dumaro Municipal Police Station, ginpahayag nga takna alas 8:51 sang gab-i samtang yara sa baklonahi si Nilo Huta 23-anyos kabulig sang nasambit nga alkalde, nga nagapungko nakabati ini sang mabaskog nga pagsigabong sa guha sang kudal kag nakit-an sini nga nasunog na.
Bangud sini, gilayon nga nagpadulong sa talatapan sang Dumarao Municipal Police Station si Atty. Grace Hachuela asawa sang alkade agud i-report ang nasambit nga insidente.
Gilayon naman nga ginpadulungan sang mga otoridad ang ginluntaran sang insidente kaupod ang Scene of the Crime Operatives (SOCO), agud magpatigayon sang imbestigasyon.
Nakit-an sa lugar ang isa ka ginapahayag Grenade Hand Fragmentation High Explosives (HE), M26 kag safety lever.
Maswerte na lamang nga wala sang may napilasan sa nasambit nga hitabo.
Sa karun, padayon pa ang imbestigasyon sang mga kapulisan agud matumod kun anu ang tuyo sang insidente.
