ROXAS CITY – Gintupok sang kalayo ang puluy-an sang senior citizen takna alas 5:00 sang hapon, Setyembre 14,2023 sa Barangay Poblacion Tacas, Cuartero, Capiz.
Ginkilala ang tag-iya sang balay nga si Elizabeth Castillo, 89-anyos, residente sang nasambit nga banwa.
Sa impormasyon nga nakuha sang Bombo Radyo nagikan sa Bureau of Fire Protection (BFP) – Cuartero, ginapahayag nga yara sa gawa sang balay ang tigulang sang hinali lang nga nag-ibwal ang kalayo sa sulod rason nga iya ini ginkakibot.
Nahibaluan human sa light materials ang balay rason sa madasig nga paglapta sang kalayo.
Natigayon naman nga napalong ang kalayo sa pagresponde sang Bureau of Fire Protection kag gindeklarar nga fire out makaligad ang 32 minutos.
Ginabulubanta mas o menus P22,500 ang nangin halit sang nasambit nga sunog.
Sa karon nagapadayon pa ang imbestigasyon kun ano ang gintunaan sang sunog.
