Ginpahibalo sang Department of Energy (DOE) nga nagkasugot ang mga kumpanya sang langis nga ipatuman ang pagtaas sang presyo sang langis sa staggered o paamat-amat nga paagi subong nga semana.
Suno sa DOE, ang ini nga tikang ang may tinutuyo nga malikawan ang daku nga pagtaas sang presyo nga magahatag sang kalit nga epekto sa mga istasyon sang gasolina.
Samtang, ginsiling ni Sharon Garin, Officer-in-Charge sang DOE, nga ang ini nga tikang ang kabahin sang ila nga pangabudlay agud mapamag-an ang epekto sang presyo sang langis sa mga pumuluyo.
Dugang pa sang DOE, ang mga kumpanya sang langis magasumiter sang ila plano para sa staggered nga price hike, lakip na ang breakdown sang mga adjustment, antes mag las 6:00 sa gab-i sa Lunes, Hunyo 23. Kadungan sini, ginsugtan sang DOE nga dugangan sang mga kumpanya sang langis ang mga retail stations nga magahatag diskwento sa mga sektor sang transportasyon bilang bulig sa mga apektado nga drayber.
Nahibaluan nga may yara man sang dugang nga pagtalakay nga ipatigayon sang DOE kag mga kumpanya sang langis sa Miyerkules, Hunyo 25, agud husto nga paga-istoryahan ang mga mahimo mahatag nga bulig sa mga vulnerable sectors pareho sang mga drayber kag mangunguma.
Samtang, nakaset man si Garin nga makighinun-anon sa mga opisyales sang Department of Transportation (DOTr) kag Department of Agriculture (DA) sa Martes, Hunyo 24, agud talakayon ang posibilidad sang subsidiya para sa mga pampasahero nga drayber kag mangunguma, kon maglapaw pa ang presyo sang krudo sa $80 kada barrel.
