ROXAS CITY – Kadungan sang nagahilapit nga pista minatay sa bulan sang Nobyembre, may yara na sang pila ka mga pumuluyo ang nagapadulong sa tagsa ka mga patyo agud magpaninlo kag magpaminta sa mga nitsu kag pantyon sang ila mga himata.
Sa interview sang Bombo Radyo kay Reynaldo Ledesma, isa sa mga “clean for hire” sa Barangay Banica sining siyudad nga may pila man ka mga pumuluyo ang nagakuha sa ila agud nga pintahan kag tinloan ang tagsa ka mga nitsu, museleo ukon pantyon sa Banica Public Cemetery.
Ginpahayag sini nga nagalab-ot sa P700 tubtob P1,500 ang sukot nila sa pagtinlo sa tagsa ka mga nitsu, pantyon ukon museleo.
Sa nasambit nga kantidad kalakip na diri ang tanan nga mga kagamitan nga gamiton sa pagtinlo kag sila na mismo ang nagabakal sang pinta.
Samtang, indi man malikawan suno kay Ledesma nga may pila ka mga kabataan nga nagasukot sa barato nga presyo apang ang iban sa ila indi man sang maayo ang guwa sang ila nga pagpinta kag pagtinlo.
Dugang pa sini nga tuman kalayo ang ila kita subong bangud man sa pandemya nga ginapangatubang sang pungsod kun ikumparar sang tinalikdan nga pista minatay.
