ROXAS CITY – Wala gin-ekspektar sang mga pumuluyo nga apektado sa nagluntad nga landslide sang Sitio Agtinapay Uno, Barangay Ilaya, Ivisan ang mabaskog nga pag-ilig sang tubig sa ila sapa.
Ini ang ginpahayag ni Melody Aspeda, residente sang nasambit nga barangay kag apektado sang landslide.
Suno diri, ginakabalak-an nila nga matabo liwat ang kapareho nga insidente gani ginapangayo nila ang bulig sang ila gobyerno lokal nga hatagan sila sang mahalinan ukon relokasyon bangud indi nila masiguro kun san-o ini liwat matabo nga mangin peligro sa ila kabuhi.
Dugang ni Aspeda, madugay na sila nagapuyo sa bahin sang ginluntaran sang insidente kag subong lamang natabo ang gulpiyada nga pagbaskog kag pagtaas sang tubig sa sapa nga amu ang ginalantaw nga rason sa paghumok kag pagtiphag sang duta.
Matandaan nga 1 ang totally damaged nga balay nga ginapanag-iyahan ni Mr. Sherlito Andrada Mercurio nga sa karon nagatiner sa ila himata malapit sa lugar samtang 3 naman ang partially sa nagluntad nga landslide kag masuwerte wala sang napilasan sa mga naulamid nga puluy-an.
Sa karon, nagpalab-ot na ang opisyales sang ila barangay sang bulig sa mga apektado nga residente kag ginpaandaman ang mga ini nga kun mahimo indi danay magbalik sa lugar sang insidente.
