ROXAS CITY – Nagaapelar sa karon sang bulig ang mga pumuluyo sang Barangay San Jose, Roxas City agud masolusyunan ang madugay na nila nga problema natuhoy sa sanitary landfill sa lugar nga nagailig ang mahigko nga tubig direkta sa ila nga sapa kag ginapahayag may kalakip pa nga mga basura.
Luyag sang mga residente sa Sitio Guimba nga aksiyunan sang ila mga opisyales sa barangay kag idangop sa gobyerno sang siyudad ang amo nga problema antes pa man makatuga ini sang peligro sa ikaayong lawas sang mga pumuluyo.
Suno sa wala na ginhingadlan nga tagreklamo, duha na sini ka mga karabaw ang nagkalamatay matapos nga nakainom sang tubig sa sapa nga gina-iligan sang water waste gikan sa sanitary landfill.
Una diri suno sa iya amo sadtong bulan sang Mayo kag ikaduha amo sadtong bulan sang Setyembre kun sa diin kasunod sang pag-inom sang iya mga karabaw sang tubig sa amo nga sapa.
Suno diri nga una nga nagpangluya ang iya mga karabaw kag makaligad ang pila ka oras, napatay ang mga ini.
Suno diri nga sang nakaligad nga mga binulan, matin-aw pa ang tubig sa sapa apang sang amat-amat nga nagapuno ang sanitary landfill, nagsugod naman ini nga maglubog.
Sang ginpadulungan sang Bombo Radyo ang nasambit nga sapa, nakit-an man nga may mga basura sa panghigaron nga ginapatihan gikan sa sanitary landfill.
Bangud diri luyag sang mga pumuluyo sa lugar nga hatagan sang pagtamod ang amo nga problema bangud tuman ini ka makatalagam para sa ikaayong lawas sang mga pumuluyo.
