Ginkumpirmar ni Punong Barangay Wilmar Brinosa sang Barangay San Antonio, Cuartero Capiz, nga yara na sa istable nga kondisyon ang mga pumuluyo sang ila lugar.
Ini matapos ang na-eksperyensyahan nga pagbaha sa lugar kadungan sang padayon nga pagbubo sang mabaskog nga ulan.
Mahibaluan nga yara sa masobra 1,700 ang residente sang barangay kung sa diin 30 sa mga ini ang naapektuhan sang baha.
Suno kay Brinosa, ini ang masami nila nga na-eksperyensyahan sa tion nga magpadayon ang ulan sang pila ka oras.
Matandaan nga sadtong Huwebes Setyembre 12, nastranded ang mga estudyante, mga manunudlo kag mga tawo nga magatabok kun tani sa overflow kung sa diin natigayon nga makatabok ang mga ini takna alas 8:30 na sang gab-i.
Mensahe sang Punong Barangay sa iya nasakupan nga maghalong kag mangin aligmat pag-abot sa subong sini nga tion.
