ROXAS CITY – Yara sa karon sa proseso sang paglalaw kag kalisod ang bug-os nga pumuluyo sang United Kingdom matapos ang masubo nga balita nga nagtaliwan na si Her Majesty Queen Elizabeth II sa edad nga 96-anyos sang Setyembre 8.
Ini ang ginpahayag ni Mr. Roland Crispo, Bombo International Correspondent sa UK sang ma-interview sang Bombo Radyo.
Suno kay Crispo, ang 10 days of mourning ang ba-se sa monarch protocol kag tradisyon kun sa diin sa sulod sang 10 ka adlaw magalalaw ang royal family amu man ang pumuluyo sang nasambit nga pungsod antes patigayunon ang pagdul-ong sini sa katapusan nga palahuwayan.
Samtang padayon naman ang pagkadto sang mga pumuluyo sa Buckingham Palace sa London apisar wala pa didto ang bangkay sang Reyna nga nagapabilin pa sa pungsod Scotland kun sa diin siya gintinguhaan mabulong.
Ginsiling ni Crispo nga posible katigulangon kag komplikasyon ang gintunaan sang kamatayon sang Reyna dugang pa nga ginbatyag niya ang pagtaliwan sang iya asawa nga si King Philip nga amu nagaserbe niya kabakod kag kabulig solbar sang problema.
Matandaan nag-angkon man sang balatian nga Covid-19 ang Her Majesty Queen Elizabeth II kag matapaos sini nagdeklarar ang Bukingham Palace nga mangin limitado na lamang ang public appearances amu man sa mga meeting sa organizations ang reyna.
Dugang pa niya nga ulihi nga nakita ang reyna sa publiko sang Platinum Jubilee Celebration sini sang nakaligad nga bulan sang Hunyo kun sa diin nag ba-bye pa ini nga masami niya ginahimo sa publiko.
Nagpatigayon naman sang joint session ang House of Commons agud maghatag sang simpatya sa pagtaliwan sang Reyna kag natalana diri nga magdul-ong sang speech si Incoming King Charles III kag diri mahibaluan ang opisyal nga announcement para sa mga masunod nila nga himuon.
