ROXAS CITY – Magapatigayon sang joint military operation ang Chinese government sa palibot sang isla sang Taiwan, ini matapos ang pagbisita ni US House Representative Nancy Pelosi sa Taiwan, kagab-i sang Martes.
Apisar sini nga makalaarma nga tikang sang China, talalupangdon nga wala naga-panic ang mga residente sang Taiwan, suno ini kay Bombo International Correspondent (BINC) Dr. Reynand Fenolan Dumalaon, direkta sa Taiwan, sang mainterview sang Bombo Radyo.
Suno kay Dumalaon, nga sumugod buwas nga adlaw, magapatigayon sang missile attack ang China apang sa kadagatan ini patup-on.
Bilang aksyon sang gobyerno sang Taiwan, may messages ukon alerts nga nababaton ang mga residente sa mga dapat himuon sa tion nga magka-giyera, apang para kay Dumalaon, nga wala sang matabo nga giyera sa tunga sang China kag Taiwan bangud una indi pabor ang International Community, kag madamo sang mangin apektado nga pungsod kalakip ang Pilipinas.
Nagapati man si Dumalaon nga ang pagpadulong ni Pelosi sa Taiwan ang may kaangtanan sa kampanya para sa kahilwayan sang pungsod, apang ginklaro sang representante sang Estados Unidos nga depende sa gihapon sa Taiwan ang amu nga tikang kag indi ini ang mayor nga rason sa pagpadulong sang US Representative.
Nahibaluan ginkaakig sang Chinese government ang pagdayon sang US sa pagpakadto sang ila representante sa Taiwan, bangud kaangay sa gin-bypass sila sang US nga matandaan ginapanindugan sang China nga ila teritoryo ang Taiwan.
