ROXAS CITY – Preparado na ang pungsod Japan, para sa palaabuton nga 19th FIBA Basketball World Cup 2023 bilang isa sa mga host country nga magasugod sa Agusto 25 tubtob Setyembre 10 subong nga tuig.
Sa interview sang Bombo Radyo kay Bombo International Correspondent Josel Palma direkta sa Japan, ginpahayag sini nga ini na ang ika-duha ka beses nga magahost ang pungsod matapos ang ika-16th edition sang world cup.
Mahibaluan nga sang nakaligad nga mga tuig naghost man ang Japan sang International Sporting Event kaparehas sang Rugby World Cup 2019, Tokyo 2020 Olympic, kag Paralympic Games.
Suno kay Palma, ginapanginbulahan sa karun sang nasambit nga host country ang pag-alabutan sang nagkalain-lain nga mga pungsod kaupod ang ila tagsa ka mga players para sa amu nga hinampang.
Ini ang labing una nga kahigayunan nga makaupod bilang host ang Pilipinas, Japan kag Indonesia kung sa diin ang Japan kag Indonesia ang magahost sang Group Phases samtang ang Pilipinas ang magahost naman sang Group kag Final Phases.
Sa pagsugod sang 2023 FIBA World Cup, una nga makasambuwa sang Angola ang Italy sa tournament inaugural match, samtang ang hubon naman sang Estados Unidos makasambuwa ang Greece, Jordan, kag New Zealand.
Ginpahayag man ni Palma nga ang Okinawa Arena, kung sa diin pagahiwaton ang world cup ang pinakadako nga lugar nga ginapahamtangan kag ginapatigayunan sang pila ka mga aktibidad kag sarang nga maka-cater sang kapin 10,000 nga mga indibidwal.
Samtang, gintuad man sini nga sa pihak sang na-eksperyensyahan sa karun sang Japan nga bagyo padayon sa gihapon suno diri ang ginapatigayon nga preparasyon sang gobyerno sa nasambit nga pungsod.
