Ginpahayag sang ICC-accredited lawyer nga si Atty Joel Ruiz Butuyan sa isa ka interview nga temporaryo lamang nga mahilway si anay Presidente Rodrigo Roa Duterte kon malapit lang ini sa The Netherlands kun sa diin ipatigayon ang hearing sa International Criminal Court (ICC) sa The Hague.
Ang nasambit nga pahayag ang kasunod sang hingyo sang kampo ni Duterte nga temporaryo ini nga buy-an sa wala ginhingadlan nga pungsod nga ginpahayag nagpasugot nga mag-host sa iya.
Suno kay Butuyan, kinahanglan nga miyembro sang ICC ang pungsod nga makabaton lang kay Duterte agud nga makasunod sa pagsulundan sang korte.
Madumduman nga ginkumpirmar sang piskalya nga wala sila nagapamatok sa hingyo gikan sa kampo sang anay Presidente basta matuman ang mga kondisyon nga ginalakipan sang pagdumili kay Duterte sa paggamit sang internet ukon cellphone kag pagpahanugot lamang sa mga katapo sang pamilya nga makig-angot sa iya.
Wala nagakabalaka ang abogado sang ICC sa kahadlok sa posible nga kahilwayan ni Duterte nga suno sa iya magatuga sang kahadlok sa mga biktima sang extrajudicial killings sa idalum sang iya kampanya nga ‘war on drugs’ kag mahimo man nga makaapekto sa integridad sang International Court.
Ginpanginwala man sini ang naglapta nga balita tuhoy sa senador nga mahimo ibalik sa Pilipinas si Duterte kag gintawag ini nga “fake news”.
Suno kay Butuyan, indi pulitika ang kaso nga ginapangatubang sang anay presidente, kundi para sa mabug-at nga krimen batok sa katawhan.
