ROXAS CITY – Nagdepensa ang punong barangay sang Barangay San Jose, Roxas City natuhoy sa alegasyon sa iya sang 62 anyos nga si Gene Divino.
Suno kay Punong Barangay Albert Calipayan, wala sang kamatuoran nga ginmulay niya si Divino.
Ginpahayag sini nga nagpadulong sa iya talatapan si Divino agud magpabalhag kaupod ang mga kapulisan natuhoy sa ginapahayag pagsumbag sa iya sang barangay tanod nga si Boy Roxas.
Suno kay Calipayan, maayo ang iya pag-akomodar sini kay Divino bangud nahangpan niya nga trabaho sini nga akomodaron ang kapareho sini nga mga sitwasyon.
Suno pa kay Calipayan nga indi sini sang batasan ang pagmulay sa iya isig-kapareho kag wala man ini makabungad sang malain nga mga tinaga ilabi na nga may presensiya pa sang mga kapulisan.
Madamo suno sa iya sang makapamatuod nga wala niya ginmulay si Divino bangud magluwas sa mga kapulisan, yara man ang presensiya sang iban nga mga konsehales sang ila barangay sa amo nga hitabo.
Una naman nga nahibaluan ni Calipayan nga ginsumbag sang barangay tanod nga si Roxas si Divino matapos nga ginliab ini sang naulihi.
Ginpanindugan man ni Calipayan nga indi sini sang kilala si Divino kag ang iya lamang nahibaluan nga bise-presidente ini sang asosasyon sang mga pumuluyo nga naga-estar sa Angelville sa nasambit nga barangay.
