ROXAS CITY – Ginpanginwala ni Punong Barangay Reynaldo Alparaque sang Barangay Cogon, Roxas City ang alegasyon ni Lolito Cerelos, nga nagbuya ini sang mga tinaga nga nagapahanugot sa tag-iya nga magkolekta sang kwarta sa tanan nga maga-agi sa ila duta.
Ini ang matapos nagpalab-ot sang reklamo si Cerelos sa Bombo Radyo, nga daw kaangay ginbaliskad sila ni Alparaque agud magguwa sila nga malain bangud sa pagpanukot nga wala sang barangay permit.
Sa interview sang Bombo Radyo kay Alparaque, ginsiling sini nga nagpadulong sa iya talapatan ang pamilya Cerelos agud mangayo kuntani sang permit apang wala ini nagpasugot bangud suno diri, iligal kag wala nakasaad sa ordinansa ang pagkolekta sang kuwarta sa umalagi.
Sa baylo ginhambalan sini ang mag-pamilya nga, nakadepende sa ila kun ano ang ila himuon sa propedad bangud kinamatarong nila ini.
Aminado naman ang Kapitan nga nahibaluan sini nga ginapanag-iyahan sang asawa ni Cerelos ang nasambit nga dalan nga gina-agyan na sang pumuluyo sa sulod sang 30 katuig, gani ginarespeto sini ang nangin desisyon sang magpamilya.
Hugot naman ang pagpati ni Alparaque, nga wala ini sang may ginhimo nga sala bangud nagasulod lang siya sa ginapatuman nga ordinansa sang City government.
Sa karon, napalab-ot na ni Alparaque ang isyu sa city government kag nagalaum nga masolbar na ini agud indi na makatuga sang perwisyo sa magtimbang nga bahin.
