ROXAS CITY – Aminado ang Punong Barangay sang Barangay Libas, sini nga syudad nga may nagapatigayon sang iligal nga pagbulang sa ila nga barangay, apang wala sini ginatolerar ang kaangay nga bulohaton.
Ini ang ginkumpirmar ni Barangay Kapitan Richard Arrojado sang mainterview sang Bombo Radyo.
Suno diri, wala sila nagkulang sa pagpaandam sa mga bulangero nga mag-untat na sa ila paghampang bangud iligal kag hugot nga ginabawalan pa sa karon ang pagpatigayon sang tupada.
Bangud diri, wala na ini sang mahimo sa mga nagkaladkpan nga mga persona.
Nahibaluan nga nakabati na ini nga sang Disyembre sang nagligad nga tuig, may mga grupo sang kalalakinhan nga nagasaka sa bukid kag nagabulang, rason nga ginpamonitor sini, apang pag-abot sang mga ginsugo niya nga magadakup sa akto sang nagabulang, nagapanago man ang mga ini bangud may nagasugid nga ginamonitor sila sang barangay.
Matandaan nga nadakpan sang mga katapo sang Roxas City PNP ang 9 ka mga persona kalakip na ang menor de edad nga lalaki nga akto nga nagapatigayon sang iligal nga pagbulang sa kabukiran nga sakup sang Purok 1, sa nasambit nga banwa, kahapon nga adlaw sang Domingo.
