ROXAS CITY – Isa-isa nga ginsabat ni Punong Barangay Jocelyn Asis ang ginpalab-ot nga reklamo sang pila ka residente sang Barangay Lawaan, Roxas City natuhoy sa ginapahayag indi patas nga pagpanagtag sang food packs, bugas kag listahanay sang mga benepisyaryo sang Social Amelioration Program (SAP) sang Department of Social Welfare and Development (DSWD).
Suno kay Asis, nagalibot ang mga Barangay Health Workers (BHW’s) agud matumod ang mga pigado nga pamilya nga una mahatagan sang bulig kapareho sang mga food packs.
Pag-abot naman sa makabaton sang tunga sa sako nga bugas sang gobyerno sang siyudad, ginpahayag ni Asis nga wala pa matapos sang pagpanghatag ang bugas para sa 2, 081 ka mga households sang barangay.
Ginpanindugan naman ni Asis nga ang pagtumod sang mga benepisyaryo sang (SAP) sang DSWD ang nakadepende sa guidelines sang ahensiya.
Suno diri nga nagapasa sila sang listahan kag ini ang gina-validate pa sang ahensiya.
Nagpanawagan naman si Asis sa mga pumuluyo nga mag-diretso sila sa iya talatapan kun may mga reklamo bangud pagatinguhaan sini nga sila ang mabuligan.
