ROXAS CITY – Ginbali sang punong barangay sang Barangay Pawa, Panay, Capiz ang report nga may nahinabo nga picturanay kag pagbawi-ay sang P6,000 nga Social Amelioration Program sang gobyerno sa isa ka PWD sang nagpanagtag ang Department of Social Welfare and Development Office sang ayuda sa nasambit nga lugar sang damlag lang.
Ginpahayag ni Kapitan Edilberto Bandejas nga himo himo lamang ni Jovanie Candelario 40-anyos sang Sitio Talaba, Barangay Pawa, Panay ang nasambit nga estorya bangud posible nga ginbatyag sini matapos nga wala malakip sa nakabaton sang amo nga bulig sang gobyerno.
Suno sa opisyal nga nakita sini nga wala sang ginauyatan nga kuwarta si Candelario kag wala ini nakapungko sa bangko nga ginakuhaan sang laragway sang mga benepisyaryo sang SAP.
Nahibaluan nga ang amay lamang sang tagreklamo ang nakabaton sang P6,000 kag wala si Jovanie nga naga-estar sa balay sang ginikanan.
Apang nagpanugyan si Kapitan Bandejas nga agud maklaruhan kun ano ang matood sa nagalapta nga estorya, makig-angut lamang sa DSWD bangud yara sa ila kostodiya ang mga laragway sang mga nakabaton sang SAP.
