PILAR, CAPIZ- Nagapanawagan ang Punong Barangay sang Barangay Natividad, Pilar, Capiz sa tag-iya sang Tatak Alex Dos Food Packages nga iya nasakupan nga atubangon sini ang mga tagreklamo batok sa ila.
Ang tag-iya sang nasambit nga catering amo si Joan Casipit.
Sa interview sang Bombo Radyo kay Punong Barangay Ronaldo Bargo, sang nasambit nga barangay, iya ginpahayag nga may yara na sang masobra 17 ka mga complainant ang nagpadulong sa ila nga talatapan agud nga ireklamo ang amo nga catering sa kaso nga pagpanunto sa ila.
Suno kay Punong Barangay Bargo, nakapaguwa na sila sang duha ka mga summon batok sa ginareklamo apang wala sa gihapon ini nag-atubang agud nga athagon ang natabo.
Pahayag niya, bangud sa amo nga hitabo, magapaguwa sila liwat sang katapusan na nga summon kag pagahulton sang mga tagreklamo si Joan Casipit sa nasambit nga barangay hall. Pananglitan indi pagid magpakita ang tag-iya sang catering diri kag maga-isyu sang Certificate to File Action ang barangay agud mapasakaan sang kaso ang ginareklamo
Madumduman nga sang damlag lang, ginpabombo sang mga ginapahayag biktima si Joan Casipit sa diin ginaalegar nagpangtaban sang masobra P300,000 nga balor sang kwarta.
Nagalaum naman ang natungdan nga atubangon na sang ginareklamo ang mga naatraso sini agud nga mahatagan sang kaathagan kag nagpasalig nga bug-os nga magasuporta ang barangay.
Samtang, nagapabilin nga bukas ang istasyon sang Bombo Radyo Roxas para sa pagpaathag sang tag-iya sang nasambit nga catering.
