ROXAS CITY – Nagahimo na sang pila ka mga tikang si Punong Barangay Lilian Cordinello sang Barangay Luctogan angut sa natabo nga pagpangawat sang isa ka tricycle sa Sitio Libot, Barangay Luctogan, Roxas City sang damlag lang.
Sa interview sang Bombo Radyo kay Punong Barangay Cordinello, ginpahayag sini nga ini ang labing una nga natabo sa ila barangay.
Mahibaluan nga ginagamit ni Berwil Aranzado tag-iya sang amu nga tricycle sang ila pangabuy-anan sa madugay na nga tyempo.
Suno kay Cordinello, dako ang iya pagkabalaka sa natabo nga pagpangawat sa ila lugar kag posible suno diri nga madugay na ginaplanohan sang wala makilan-an nga kawatan ang pagpangawat antes ini natigayon.
Mensahe sini sa mga pumuluyo nga mag-aligmat, siguraduhon nga naka-lock ang mga salakyan kag motorsiklo ukon mahimo indi na magparking sang sa kilid sang dalan.
Nagahinyo man ini sang suporta kag koordinasyon agud indi na maliwat ang nasambit nga hitabo.
