ROXAS CITY-Gin-athag sang Punong Barangay sang Barangay Sibaguan sining siyudad nga wala nakapauli sa ila barangay ang magpakaisa nga nagpositibo sa COVID-19.
Ini ang ginkompirmar ni Punong Barangay Johny Arcega sang mainterview Bombo Radyo.
Ginpahayag ni Arcega nga isa na ka-bulan nga wala nakapauli ang magpakaisa sa nasambit nga barangay matapos nga nagbantay ini sa ila nga himata nga madugay na nga na-confine sa Western Visayas Medical Center sa siyudad sang Iloilo.
Suno kay Arcega nakabaton ini sang impormasyon gikan sa City Health Office nga may yara sang duha ka mga indibidwal nga nagpositibo sa ila nga barangay.
Sa pagpangusisa ni Arcega, nagapabilin nga asymptomatic ang magpakaisa nga padayon naman nga gina-quarantine sa nasambit nga ospital.
Mahibaluan nga ang nasambit nga mga indibdiwal ang residente sang nasambit nga barangay.
Sa karon naglab-ut na sa 100 ang kabug-osan nga kaso sang COVID-19 sa siyudad kun sa diin 30 diri ang ginakabig nga active cases, 61 ang nag-ayo samtang 9 naman ang ginbawian sang kabuhi.
