ROXAS CITY – Hustisya karon ang ginasinggitan sang isa ka senior citizen nga ginbuyayaw, gintutukan sang armas kag ginpalpag ang nalikod nga bahin sang lawas sang punong barangay sang Barangay Casanayan, Pilar, Capiz.
Natabo ang insedente samtang padulong sa wet market sang Barangay Casanayan, Pilar ang 73-anyos nga si Sevilla Ruada sang Barangay San Antonio, Pilar para magbaligya sang ginharvest nga mga utanon.
Wala ginalauman ang matunog nga pagbusina sang motorsiklo ni Kapitan Cesar Boy Bermejo.
Sa kakibot sang senior citizen, nagsinggitan ini sang sungkit sungkit sungkit sungkit, rason para papunduhon sang opisyal ang iya nga motorsiklo.
Nagpalapit ini sa tigulang kag ginaalegar nga ginmulay si Ruada sa diin wala pa nakuntento ang opisyal kag iya pa ini gintutukan sang armas kag ginpalpag ang likod kasunod ang pagpahog nga iya ini ipapreso.
Sa impormasyon nakuha sang Bombo Radyo nga naakig si Kapitan Bermejo bangud bansag ukon kumpil sini ang tinaga nga ginbuy-an ni Nanay Ruada sang ini ang makibot sa matunog nga busina sang motorsiklo sang opisyal.
