Gintawag nga butigon kag artista ni Kapitan Resty Oquendo sang Barangay Hipona, Pontevedra, Capiz ang duha ka mga vendors nga nag-alegar ginpangwas-ag sini ang mga baligya nga panakot kag utanon sa old public market sa nasambit nga barangay.
Suno sa punong barangay nga paano matabo ang alegasyon nanday Nanay Merlinda kag Manang Roselyn bangud yara ini sa crossing Texas sa diin ginapatigayon ang opening sang bag-o nga merkado sang ila barangay.
Apang aminado ang opisyal nga ginhinyo na sini sa mga vendors nga nagabaligya sa daan nga merkado nga tagsa ka Miyerkules kag Sabado sa bag-o nga merkado sila magbaligya kag bisan sa nabilin nga adlaw sang semana lamang sila magbaligya sa daan nga merkado.
Ginreklamo man ni Kapitan Oquendo ang wala na pagmentenar sa katinlo sang amo nga merkado.
Ginpanindugan sang opisyal nga palangga sini ang mga residente sang Barangay Hipona sa diin ang tanan nga iya ginahimo para sa kaayuhan sang tanan.
