ROXAS CITY – Nagpaathag ang punong barangay sang Barangay 5, Roxas City natuhoy sa ila mga ginapanghatagan sang food packs nga mga residente nga apektado sang enhanced community quarantine bangud sa coronavirus disease (COVID-19) pandemic.
Suno kay Punong Barangay Lorelei ‘LA’ Aguirre, gina-hatagan nila sang prayoridad ang mga indigent households, mga nadulaan sang trabaho kag wala sang pang-adlaw-adlaw nga palangitan-an.
Ginpahayag sini nga may yara sang 376 ka mga households ang amo nga barangay nga kalakip nga makabig nga indigent.
Nagpangayo naman sang paghangop si Aguirre sa mga indibidwal nga may ikasarang sa kabuhi nga indi mahatagan sang food packs kag naghinyo ini sa ila nga kun mahimo magpaiway anay agud mas mabuligan ang mga tuman nga nagakinahanglan.
Suno kay Aguirre nga ginahimo nila ang tanan apang nahangpan sini nga may mga negatibo nga komento sila nga mabatian bangud kasubong normal na ini sa tawo.
Nagsugod sang pagpanghatag sang food packs ang konseho sang amo nga barangay sadtong katapusan pa nga semana sang bulan sang Marso.
Ang isa ka food pack nga ginahatag ang may unod nga isa ka gantang nga bugas, duha ka sardinas, kag isa ka putos nga uga kag manok nga gikan sa isa ka private poultry company.
Ginpahayag ni Aguirre nga natalana sila nga magpanghatag sang dugang nga mga food packs sa masunod nga semana.
Suno sa opisyal nga ila ginagamit sa karon amo ang Calamity Fund sang barangay apang pananglitan maglawig pa ang COVID-19 pandemic, posible nga ila igare-align ang 20 percent Development Fund sang barangay agud gamiton para sa ila nga relief goods operation.
