Aminado ang punong barangay sang Barangay Baybay, sining syudad nga wala ini sang ideya nga sa sanitary landfill sang Roxas City gin-ula ang basura nga gikan sa banwa sang Panay.
Sa interview sang Bombo Radyo kay Kapitan Reynaldo Magallanes, ginpahayag sini nga ulihi na lamang ini nakahibalo sang nangin kontrobersiyal ang isyu kag nakalab-ot na sa kahanginan.
Ginapanindugan sini nga wala ini sang ideya nga may problema sa dumpsite sa banwa sang Panay kag ulihi na nagsugid ang driver sang garbage truck nga sa sanitary landfill sang Roxas City gin-ula ang mga basura.
Suno sa opisyal nga wala ini makabalibad kay Board Member Jonathan ‘’Sonny’’ Besa kag Sangguniang Bayan Member Paolo Besa sang Panay sang nagpanawag kag naghinyo nga mahulam sang garbage truck agud mahakot ang nagatumpok na basura bangud indi sini malimtan nga sang panahon nga nakaangkon ini sang problema sa basura sang ila barangay pagkatapos sang Supertyphoon Yolanda, isa si BM Besa sa nagsponsor sang truck kag manpower nga naghakot sang ila basura.
Apang gintuad ni Kapitan Magallanes nga si BM Besa ang nagpa-gasolina sang garbage truck kag naghatag man ini sang pakunsweldo sa mga naghakot sang basura.
Nahibaluan nga one trip lamang ang paggamit sang ila garbage truck sa paghakot sang mga basura sa Panay sang Miyerkules nga adlaw bangud suno sa driver may iban nga dump truck nga nagpanghakot sang basura sa lugar.
Aminado ang punong barangay nga bisan paano may kasaypanan ini sa insedente matapos napaslawan nga ma-imporma ang gobyerno sang syudad kag General Services Office nga sa sanitary landfill sang Roxas City naula ang basura sang Panay.
Kun nahibaluan lamang sini kuntani ang natabo, nakalisensiya ini sa natungdan nga ahensiya sang gobyerno.
Samtang nahibaluan nga sang panahon sang administrasyon ni Roxas City Mayor Vicente Bermejo may MOA sa tunga sang Roxas City government kag LGU-Panay sa diin nagabayad sila sa kada pag-ula sang basura sa sanitary landfill sa gobyerno sang syudad.
