Nagpanawagan si Punong Barangay Erwin Oroceo sang Baybay, Roxas City sa mga pumuluyo sini nga naga-istar sa coastal area nga mag-aligmat bangud nagapabilin sa gihapon sa storm signal no. 1 ang bilog nga probinsya sang Capiz bangud sa bagyo Basyang.
Sa interview sang Bombo Radyo kay Punong Barangay Oroceo, iya ginpahayag nga ginpatawag na niya ang mga opisyal sang barangay agud nga magpadulong sa mga zona kag maabisohan ang mga pumuluyo nga mangin handa sa posible nga mamunog nga ulan, mabaskog nga hangin, kag pagtaas sang balod sa baybayon.
Suno kay Oroceo, apisar nga matawhay ang baybayon subong, indi dapat nga magkompyansa ang mga pumuluyo.
Pahayag niya, kinahanglan nga mangin mabinatyagon sa gihapon ang pumuluyo kag magpamati sa mga paandam halin sa barangay, local government unit kag sa Bombo Radyo Roxas ilabi na sa latest update sa lakat sang panahon.
Dugang pa sa natungdan, kun mahimo magpabilin lang anay sa tagsa ka mga balay apang kun may pamahog na nga dala sang bagyo, mas mayo nga mag-evacuate bangud handa man ang evacuation center sang barangay.
