ROXAS CITY – Ginpahayag ni Punong Barangay Erwin Oroceo sang Brgy. Baybay, Roxas City ang iya suporta sa kampanya batuk sa paggamit sang open muffler sa mga motorsiklo kag salakyan, kasunod sa mando ni Mayor Ronnie Dadivas.
Sa interview sang Bombo Radyo kay Punong Barangay Erwin Oroceo, iya ginpahayag nga padayon ang reklamo sang mga residente bangud sa mga motorsiklo nga naga-karera ilabi na sa kaagahon, kag may open muffler nga nagahatag disturbo sa palibot.
Suno sa iya, may mga insidente man sang kabataan nga naga-drive sang motor nga wala nagasuksok sang helmet — isa pa ka isyu nga ginatutukan man sang barangay
Pahayag pa niya, nagapangayo na sila sang bulig sa Traffic Management Unit (TMU), Core Unit, kag barangay tanod agud ma-aksyunan ang nasambit nga problema.
Dugang pa sang natungdan, ginmanduan ni Mayor Dadivas ang Highway Patrol Group, TMU, kag Core Unit nga dakpon kag tiketan ang mga salakyan nga may open muffler, kumpiskahon ang tambutso kag waskon ini sa atubang sang driver. Apang kun indi makapakita sang kumpleto nga dokumento ang mga driver, igapaidalum sa impoundment ang ila mga motorsiklo.
Ginpasalig man ni Kapitan Oroceo, handa sila magkooperar sa mga ahensya agud masiguro ang kahilwayan kag katawhay sang mga residente sang sang nasambit nga barangay.
