Nagapanawagan ang Punong Barangay sang Barangay Ambilay sa banwa sang Panitan, Capiz, nga ma-turn over na sa ila ang natapos nga river control project sa lugar.
Sa interview sang Bombo Radyo kay Punong Barangay Juan Baulite, iya ginpahayag nga kun iya lantawon, 100 percent na nga kompleto ang proyekto kag daku ini nga bulig sa barangay.
Apang suno sa iya, apisar tapos na ang proyekto, wala pa ini naturn-over sa barangay.
Nahibaluan nga sang Agosto 2024 ginsuguran ang nasambit nga mitigation flood control project nga may ginabulubanta nga 67 milyon pesos nga budget, apang napunggan ang pagpadayon sang pag-ubra bangud sa pag-inulan.
Sang Oktubre 2025, liwat nga ginpundo ang pag-obra sa lugar, antes ini liwat nga ginsuguran sang Enero 2026 sa pagpanguna sang Department of Public Works and Highways ukon DPWH kag contractor nga Jasa Builders Construction.
Nagalaum ang natungdan nga makigkoordinar ang DPWH sa barangay agud maistoryahan ang pormal nga pag-turn over sang proyekto kag masiguro nga mahimo na ini magamit kag mamintinar sang barangay.
