Nakabatyag sang kakibot kag kahadlok ang Punong Barangay sang Barangay Banate, Pontevedra, Capiz matapos ini nga nakabaton ang isa ka sulat nga ginaalegar naghalin sa mga katapo sang New People’s Army (NPA) Coronation Chiva Waling-waling Command Central Front.
Sa interview sang Bombo Radyo kay Punong Barangay Arnel Barrientos, iya ginpahayag nga indi na ini ang una ka bes nga nakabaton ini sang pagpamahog apang ini ang una nga beses nga nakabaton siya sang pagpamahog halin sa mga katapo sang rebelde nga grupo.
Suno kay Barrientos, nagapati ini nga posible nahanungod ini sa gihapon sa isyu sang duta sa tunga sang pamilya Molo kag Santiago nga ginaalegar naga-intra ini sa away pinamilya.
Pahayag pa niya, nagahusay lamang ini bilang kapitan kag nagalikaw sa pagpabor sa bisan sin-o tungod nga parehas man niya nga himata ang duha ka kampo.
Apang isa ka daku nga katingalahan sa Punong Barangay kon paano ini nga isyu nakalab-ot pa sa grupo sang NPA, ilabi na nga ini isa ka lokal nga problema lamang sang magpamilya sa barangay.
Dugang pa sang natungdan, indi ini malingkang sa amo nga sahi sang pagpamahog kag padayon ini nga magaserbisyo bilang kapitan sang nasambit nga Barangay.
