ROXAS CITY – Ginpasakaan sang kaso nga Rape sa Provincial Prosecutor’s Office ang punong barangay sang Barangay Poblacion, banwa sang Dumalag, Capiz.
Ini ang kasunod sang ginaalegar pagpanghimulos ni Punong Barangay Sebastian Philip Michael Salazar sa ‘school girl’ sang ila pamilya nga si alyas Inday.
Sang ginpadulungan sang investigative section sang Bombo Radyo Roxas ang pamilya sang biktima nga si alyas Inday, nahibaluan nga tuman nga trauma ang natuga sang nasambit nga insidente sa biktima.
Mahibaluan nga sadtong bulan sang Abril sang nangin ‘school girl’ ang biktima sang pamilya sang punong barangay agud ini ang maka-eskwela.
Nahibaluan man nga kapin tatlo ka semana na ang nakaligad humalin sang naglakat ang biktima kag naglaong nga magapauli ini sa iya mga ginikanan sang makadali apang wala na ini nakabalik pa.
Hungod nga wala ginhingadlan sang Bombo Radyo Roxas ang biktima kag kun sa diin ini naga-estar bangud magluwas nga menor-de-edad ini, tuman ka sensitibo ang nasambit nga isyu.
(FEATURED IMAGE FROM WEB)
