ROXAS CITY – Nagdepensa ang punong barangay sang Barangay Alipasiawan, Dumarao, Capiz natuhoy sa ginpalab-ot nga reklamo sa Bombo Radyo angut sa ginapahayag pagbaton sang P6, 000 nga ayuda sa idalom sang Social Amelioration Program (SAP) sang Department of Social Welfare and Development (DSWD) sang iya nga bana kag ila barangay kagawad.
Suno kay Punong Barangay Naty Jane Hablo, matuod nga nakabaton sang nasambit nga ayuda si Barangay Kagawad Azucena Factor sa pihak nga nasandig sa guidelines sang DSWD nga indi mahimo makabaton sang amo nga bulig-pinansiyal ang mga barangay officials.
Apang suno diri nga nalakip sa listahan sang benepisyaryo sang (SAP) ang amo nga barangay kagawad bangud isa ini ka senior citizen kag may anak pa nga isa ka Person With Disability (PWD) ukon may kasablagan sa lawas.
Ginkompirmar man sang amo nga punong barangay nga nahatagan ang iya bana sang nasambit nga ayuda apang gilayon man ini nga ginbawi kag ginpabalik sa (DSWD).
Mahibaluan nga ang banwa sang Dumarao ang pinakauna nga banwa nga nakapanghatag sang nasambit nga ayuda sa mga labing nagakinahanglan nga pumuluyo nga apektado sang ginapatuman nga Enhanced Community Quarantine (ECQ) bangud sang coronavirus virus (COVID-19) pandemic.
Kalakip sa mga kabaranggayan sa amo nga banwa nga una na nahatagan sang nasambit nga ayuda amo ang Alipasiawan, Bayog, Kalapawan, Tambad, Taslan kag Salcedo.
