Arestado ang isa ka Punong Barangay sa Barangay San Pedro, Pontevedra, Capiz, matapos makuhaan sang mga otoridad sang mga armas-luthang nga wala sang nagakaigo nga lisensya ukon permit.
Ang arestado amo si alyas “Ger,” 59-anyos, residente sang Sitio Ilongbukid Barangay San Pedro sa amo nga banwa matapos ginserbe ang search warrant sa mismo puluy-an sini.
Sa interview sang Bombo Radyo kay Police Captain Maria Fe Umiten, Officer-in-Charge sang Pontevedra Municipal Police Station, iya ginpahayag nga amo nga Punong Barangay ang nagapanguna sa pag-surrender sang mga loose firearms sa 27 ka barangay sa banwa sa diin sa iya barangay naglab-ot sa 12 ka mga armas ang nasurender sa ila talatapan.
Suno kay Umiten, kabahin ini sang programa nga Restrict, Track and Turn-In ukon RTT 3389 sang PRO-6 kag CAPeace-Tawhayan sang Capiz Police Provincial Office, nga amo ang boluntaryo nga pagsurender sang mga loose firearms agud malikawan ang mga insidente may kaangtanan sa armas-luthang.
Narekober sa balay ni alyas Ger ang isa ka .45 caliber pistol nga may duha ka magazine 16 ka bala, isa ka .38 caliber revolver, kag isa ka 12-gauge homemade shotgun nga wala sang nagakaigo nga permit ukon lisensya.
Sa subong, yara na ini sa kustodiya sang CIDG samtang magapangatubang sang kaso sa paglapas sa Republic Act 10591 ukon Comprehensive Firearms and Ammunition Regulation Act.
