Ginkakibot sang punong barangay sang Barangay 2, Roxas City sang nabatian sa Bombo Radyo nga nadakpan ang isa sini ka kagawad sa barangay nga nagapatigayon sang iligal nga pabulang sa Aguiling Plains, Barangay Mongpong, sining syudad.
Sa interview sang Bombo Radyo kay Kapitan Luzminda Dela Cruz, ginpahayag sini nga wala siya sang ideya nga naga-entra sa kasubong nga iligal nga aktibidad si Kagawad Jolito Almodiente 45-anyos.
Suno sa opisyal nga wala ini nagakulang sa pagpahanumdum sa ila nasakupan nga indi magpatigayon sang anuman nga iligal nga aktibidad kasubong sang bulang kag sugal, bangud hugot ini nga ginadumilian.
Ba-se man sa monitoring ni Kapitan Dela Cruz ngA wala sang iligal nga pabulang sa ila barangay nga nagakahinabo.
Nagpanugyan man ini sa publiko nga indi mangin pasaway kag sa baylo mangin masinulundon lamang.
Samtang pag-abot sa performance ni Kagawad Almodiente sa ila barangay wala sang masaway ang nasambit nga punong barangay bangud ginahimo man sini ang iya trabaho.
