Indi pabor ang Punong Barangay sang Barangay 2, Roxas City sa hagna nga i-postponed ang Barangay kag Sangguniang Kabataan Elections (BSKE) sa Nobyembre 2026.
Kasunod ini sa ginaduso ni Senator Imee Marcos nga ipaiway anay bangud sa krisis nga ginapangatubang sang pungsod.
Sa interview sang Bombo Radyo kay Punong Barangay Joelito Aguil, iya ginpahayag nga dapat madayon ang BSKE Election bangud tuyo niya nga hatagan sang kahigayunan ang iya mga kaupdanan nga nagahana nga magpapili ukon magpadalagan bilang kapitan sa amo nga barangay.
Pahayag pa ni Aguil nga kon ipaiway ang eleksyon, mahimo ini magpahaba sang termino sang mga yara na sa pwesto kag madulaan sang tsansa ang iban nga gusto magserbisyo sa ila komunidad.
Dugang pa niya nga bilang isa ka amay sang barangay, handa sa gihapon sila kag ginarespeto ang mangin desisyon sang national government may kaangtanan sa eleksyon.
Apang ginpahayag niya nga nagalaum siya nga padayon nga iprioridad ang tingog sang pumuluyo kag ang ila kinamatarong nga makapili sang ila mangin lider pinaagi sa husto kag regular nga eleksyon.
