ROXAS CITY -Aminado ang Punong Barangay sang Barangay Baybay Roxas City nga madamo sang mga indibidwal nga nagakaladakpan nga wala nagasuksuk sang facemask kag faceshield sa nasambit nga barangay.
Ginpahayag ni Punong Barangay Reynaldo Magallanes nga madamo sang mga nagakaladakpan nga mga indibidwal nga wala nagasuksuk sang facemask kag faceshield sa Peoples Park sa nasambit nga barangay.
Apang gin-athag sini nga kadam-an sang mga nagkaladakpan amo ang mga indibidwal nga nagapadulong sa Peoples Park agud maglugayawon, mag-jogging kag masami nagapaligo nga indi man mga residente sa amo nga lugar.
Suno sa opisyal nga wala na sini ginkatingala nga madamo ang nagkaladakpan sa amo nga barangay bangud sang Peoples Park ang masami ginapadulongan sang kadam-an.
Samtang ginpanindugan ni Magallanes nga wala man nagkulang ang barangay sa pagbantay kag paghatag sang panugyan sa mga pumuluyo apang may yara gid suno diri sang mga indibidwal kag residente nga mga matig-a sang ulo.
Suno kay Magallanes nga naga-roving ang mga barangay tanod kaupod ang mga kapulisan agud badlongon ang mga wala nagsuksuk sang facemask kag faceshield.
Mahibaluan nga sandig sa datos sang Roxas City COVID-19 task Force, ang Barangay Baybay ang may yara sang may pinkamadamo nga violators pag-abot sa pagsuksuk sang facemask kag faceshield.
