ROXAS CITY – Ginpanginwala sang punong barangay sang Barangay Dayhagan, Pilar, Capiz nga may yara ini sang kaangtanan sa operasyon sang ilegal nga bulang matapos nga may nadakpan ang mga kapulisan sa nasambit nga barangay sang nakaligad nga adlaw sang Dominggo.
Ini ang ginpahayag ni Punong Barangay Janito Bartolome sang ma-interview sang Bombo Radyo Roxas.
Suno kay Bartolome nga wala ini nagatenir sa ila nga barangay kun Dominggo nga adlaw bangud ginahatagan man sini sang oras ang iya nga pamilya.
Aminado si Bartolome nga nakahibalo siya nga may nagapasampok sang manok kada Dominggo nga adlaw apang wala sang tay-anay nga nagakahinabo.
Ginklaro man ni Bartolome nga wala sang may nagpalapit sa iya agud magpangayo sang permit.
Aminado si Bartolome nga may yara ini sang ginapanag-iyahan nga manok apang wala ini nagabulang sa mga ilegal nga bulangan.
Ginpanindugan man sang opisyal nga wala ini sang may nabaton nga kwarta gikan sa ilegal nga bulang.
Nagapasalamat si Bartolome nga may nagpalab-ot sa hepe sang Pilar Municipal Police Station sang impormasyon natuhoy sa nagakahinabo nga ilegal nga bulang.
Matandaan nga naaresto sa Barangay Dayhagan, sa banwa sang Pilar sanday Ricky Colmo, Reno Castor kag Gary Francisco kag nakuha sa mga ini ang walo ka patay nga mga manok nga gingamit sa bulang.
Mahibaluan nga ang nasambit nga mga indibidwal ang nagpatigayon sang bulang sa indi lisensiyado nga cockpit arena.
