ROXAS CITY – Ginpa-suspinde sang Roxas City Council ang punong barangay sang Barangay Inzo Arnaldo, Roxas City.
Ini ang ginkompirmar mismo sang Sangguniang Kabataan (SK) Chairperson sang nasambit nga barangay sang mainterview sang Bombo Radyo.
Suno kay SK Chairman Cyril De Juan, duha ka bulan nga suspendido bilang punong barangay si Einstein Okpora.
Ini matapos nga ginpaboran sang konseho sang siyudad ang ginpalab-ot nga reklamo batuk sa nasambit nga punong barangay.
Mahibaluan nga nag-ugat ang reklamo batuk kay Okpora sa ginapahayag pagtugda sini sa pondo sang SK sang barangay.
Ginaalegar ni De Juan nga sa kapin P60, 000 nila nga pondo para sa Barangay Basketball League, kapin sa P39, 000 gid lamang ang naggamit kag may nabilin pa nga pondo nga nakabutang sa vault sang barangay.
Magluwas diri suno kay De Juan, indi man sila makahimo sang mga programa kag proyekto nga ila naplanuhan bangud nagaupang diri si Okpora.
Sa karon, desidido si De Juan nga ipalab-ot pa sa Office of the Ombudsman ang reklamo batuk sa ila punong barangay.
